أحمد on Nostr: جماعة المؤامرة مفكرين حالهم عايشين في فيلم من ...

جماعة المؤامرة مفكرين حالهم عايشين في فيلم من أفلام جيمس بوند. لما تسمع عن لقاح أنقذ حياة ملايين البشر، أول شيء بخطر ببالك هو إبرة السم في فيلم أكشن فنتازي، وما بخطر ببالك إنك أنت موجود اليوم بسبب اللقاحات.

بشكل عام، لازم تشلحوا قبعة الألمنيوم وتشيلوا الفلاتر عن عيونكم وتشوفوا العالم بألوانه الحقيقية. منظمة الصحة العالمية هي مجموعة من أطباء وعلماء وغيرهم، ومهمتهم الأساسية تنظيم ومركزة الأبحاث والمعلومات الطبية.
يعني لما تسمع إنهم يوحدوا جهود البحث العلمي الطبي، هذا مجرد تطبيق لهدف وجودهم، مش اختراع المرض القادم مخصوص إلك.

ولو زعلان لأنهم ما حكولك شو المرض القادم اللي شغالين عليه، فالموضوع أبسط من هيك: ما حدا بعرف شو المرض القادم. لكن في ناس أذكياء كفاية إنهم يشتغلوا على تقنيات ممكن تساعد بمحاربة القادم، أيًّا كان.

العالم حتى اليوم مش قادر يقضي على الفيروسات، وتعلّم طرق محاربتها شيء مهم جدًا لأنها تقتل ناس كل يوم. وصار عندنا بكتيريا مقاومة للمضادات الحيوية، وهي فعلًا بكتيريا قاتلة وما إلها علاج فعال حاليًا. مجرد إنك أنت مش متضرر مباشرة، ما يعني إن غيرك مش عم يموت ولا يعني إن الواقع يتغير لأنك قررت تلبس قبعة قصدير.

ترجمة المقتطف بسيطة جدا:
"إحنا بنحاول نطوّر تقنيات تساعد في وقف الفيروس الذي قد يسبب الوباء التالي."
مش معروف شو هو، ولا كيف ممكن يبدأ، لكن تطوير تقنيات جديدة لمحاربة الفيروسات رح يكون مفيد جدًا في مواجهة الوباء القادم، مهما كان.

المصيبة في العالم اليوم إن الطبيب والمهندس والعالم صاروا مشكوك فيهم، وكل جاهل عنده حساب على التواصل الاجتماعي صار مصدر "حقيقة مطلقة". ويا حبذا لو رمى آية من القرآن أو الإنجيل، وقتها يصير رسول لا يخطئ، حتى لو مؤهله العلمي ما يؤهله ليدخل الحمام.